प्रधानमंत्री आवास योजनेचे लाभार्थी अनुदानापासून वंचित

 शिवसंग्रामचे पालिका मुख्याधिकाऱ्यांना निवेदन

देऊळगांवराजा : अशरफ पटेल

     पक्की घरी नसलेल्या शहरातील गरजू व्यक्तींचे घराचे स्वप्न साकारण्यासाठी प्रधानमंत्री आवास योजनेच्या माध्यमातून आर्थिक अनुदान देण्यात येत आहे.मात्र देऊळगाव राजा नगरपरिषद ने डीपीआर प्लॅन नुसार शासनाला पहिली यादी सादर करून देखील लाभार्थी अद्यापही घरकुल योजनेच्या अनुदानापासून वंचित आहे.अनुदान मिळत नसल्याने गरजू कुटुंबांचे घराचे स्वप्न पूर्ण होतांना दिसत नाही.मंजूर झालेल्या डी पी आर मधील लाभार्थ्यांना तात्काळ अनुदान देण्यात यावे,अशी मागणी शिवसंग्राम संघटनेच्या वतीने पालिका मुख्याधिकारी श्री अरुण मोकळ यांच्याकडे निवेदनाद्वारे केली आहे.

              शिवसंग्राम संघटनेने दिलेल्या निवेदनात म्हटले आहे की, येथील पालिकेच्या माध्यमाने शहरातील ज्या कुटुंबाकडे पक्की बांधलेली घरी नाहीत अशा गरजू नागरिकांसाठी प्रधानमंत्री योजने अंतर्गत प्रत्येकी २ लाख ६० हजार रुपये अनुदान देण्यात येते.आवास योजनेच्या निकाषाला अधीन राहून शहरातील गरजू व्यक्तींकडून अर्ज मागविण्यात आले होते. डीपीआर प्लॅन नुसार सदर योजनेच्या २७१ लाभार्थ्यांची पहिली यादी काही महिन्यापूर्वी मंजूर करून शासनाकडे सादर करण्यात आली आहे.मात्र अद्यापही शासनाकडून सदर लाभार्थ्यांना घर बांधण्यासाठी पहिला हप्ता देखील मिळालेला नाही.आवास योजनेचा लाभ घेण्यासाठी नागरिकांनी कागद पत्राची जुळवाजुळ करून लाभार्थ्यांना जवळपास दहा ते पंधरा हजार रुपये खर्च केलेला आहे. पहिल्या डी पी आर यादीमध्ये नाव आल्याने व आवास योजनेचे अनुदान स्वरूपात पैसे मिळणार या आशेने अनेक लाभार्त्यांनी खाजगी कर्ज घेऊन घराचे बांधकाम देखील सुरू केले आहे.मात्र शासनाकडून अनुदान मिळण्यास दिरंगाई होत असल्याने लाभार्थ्यांवर कर्जबाजारी होण्याची वेळ आली आहे.पात्र लाभार्थ्यांच्या यादीत नाव येऊन देखील घर बांधण्यासाठी शासनाकडून पैसे मिळत नसल्याने पालिका प्रशासना विरोधात नागरिकांचा रोष वाढत आहे.पालिका प्रशासनाने आपल्या स्तरावरून योग्य तो पाठपुरावा करून मंजूर झालेल्या पहिल्या डीपीआर मधील लाभार्थ्यांना तत्काळ अनुदानाचा लाभ द्यावा,अन्यथा शिवसंग्राम संघटनेच्या वतीने तीव्र स्वरूपाचे आंदोलन करण्यात येईल असा इशारा शिवसंग्राम संघटनेचे तालूका अध्यक्ष राजेश इंगळे, जहीर पठाण, शे.राजू, असेफ इनामदार आदींनी दिला आहे.