कृषीमंत्री अब्दुल सत्तारांकडून सुप्रिया सुळेंबाबत अपशब्द

 

 राष्ट्रवादी काँग्रेस आक्रमक 

   देऊळगावराजा : प्रतिनिधी  

      राज्याचे कृषीमंत्री अब्दुल सत्तार यांनी राष्ट्रवादी काँग्रेसच्या खासदार सुप्रिया सुळे यांना उद्देशून एका वृत्तवाहिनीशी बोलताना अपशब्द वापरले आहेत. यावरून आता राजकीय वातावरण चांगलच तापायला सुरूवात झाली आहे. सत्तारांच्या या वक्तव्यावर  विविध प्रतिक्रिया उमटत असताना आता राष्ट्रवादी काँग्रेस पक्षाच्या वतीने अब्दुल सत्तार यांनी माफी मागावी  अन्यथा त्याला महाराष्ट्रात आम्ही फिरू देणार नाही. असा अल्टिमेटम दिला आहे. घोषणा बाजी करत अब्दुल सत्तार यांचा पुतळा जाळण्यात आला.

          कुठल्याही पक्षाची महिला असेल, कुठल्याही धमार्ची महिला असेल तिच्याबद्दल शरद पवार आणि राष्ट्रवादी काँग्रेस पक्षाची भूमिका छत्रपती शिवाजी महाराजांच्या इतिहासात जो महिलांचा सन्मान आहे, त्याला अनुसरूनच आहे. तशीच शिकवण आम्हाला दिल्या गेली. नव्हे तर आमचा पक्ष तो प्रोटोकॉल पाळत असतो. दोन दिवसांपूर्वी सत्तेतील आमदार गुलाबराव पाटील यांनीही एक वक्तव्य केलं होतं, त्यावरूनही संतापाचे वातावरण निर्माण झाले होते आणि आता सत्तेचा माज असलेले कृषीमंत्री अब्दुल सत्तार वेळ पडली तरी आम्ही त्यांना अपशब्द वापरू शकतो. परंतु ही महाराष्ट्राची संस्कृती नाही. त्यामुळे अम्हाला संस्कृतीच्या बाहेर जायचं नाही. परंतु जो शब्द अब्दुल सत्तार नावाच्या व्हायात माणसाने वापरला आहे. अम्हाला पक्षाचे संस्कार विसरून पुढची पातळी गाठता येते, मात्र ते शरद पवार, अजित पवार आणि सुप्रिया सुळे यांना खपणार नाही. म्हणून आम्ही   संयमाने बोलत आहे. स्थानिक बस स्थानक चौकात कृषीमंत्री अब्दुल सत्तारांना अल्टिमेट आहे की, २४ तासांच्या आत सुप्रिया सुळेंची नाक घासून माफी मागावी, अन्यथा त्याला महाराष्ट्रात आम्ही फिरू देणार नाही. त्याने वापरलेला शब्द हा समस्त स्त्री जातीचा अपमान आहे. त्याला जो सत्तेचा उन्माद झालाय, त्याची मस्ती आम्ही उतरल्याशिवाय राहणार नाही अशी घोषणा बाजी करत अब्दुल सत्तार यांचा पुतळा जाळून निषेध करण्यात आला. याप्रसंगी तालुकाध्यक्ष उद्धव म्हस्के, गजानन पवार, गणेश सवडे, संतोष खांडेभराड, प्रा. दिलीप कुमार झोटे, कवीश जिंतूरकर राजीव सिरसाठ, शहराध्यक्ष अ‍ॅड.अर्पित मिनासे, सै.करीम, शेख कदीर, कशीफ खान कोटकर, मो.रफीक, अरविंद खांडेभराड, धनंजय मोहिते, बैरागी, सुनिल शेजुळकर, विशाल पवार, आदी राष्ट्रवादी पक्षाचे पदाधिकारी व कार्याकर्ते उपस्थित होते.